“Bakı Münaqişə Məktəbi 2025”-ə qəbul başladı

Avrasiya Əməkdaşlıq Fondu (AƏF) gənclər üçün “Bakı Münaqişə Məktəbi”nə qəbul elan edir.

“Bakı Münaqişə Məktəbi”nin məqsədi Azərbaycan gənclərinin münaqişə və sülh sahəsində bilik və bacarıqlarını artırmaq və beləliklə də, müxtəlif platformalardakı müzakirələrdə uğurla iştirak edə biləcək yeni nəslin formalaşmasına töhfə verməkdir. Məktəbin proqramı Azərbaycan dilində keçiriləcək.

“Bakı Münaqişə Məktəbi” müxtəlif mövzularda akademik və praktik sessiyalardan ibarətdir, formal və qeyri-formal təhsil metodlarını əhatə edir. Sessiyalar sülh və münaqişə nəzəriyyələri kimi mövzularla yanaşı, qaçqın və məcburi köçkünlərin vəziyyəti, münaqişələrin gender aspekti və gənclərin rolu kimi müxtəlif aktual mövzuları əhatə edir. “Bakı Münaqişə Məktəbi”ndə müstəqil ekspertlər, elm adamları və dövlət qurumlarının təmsilçiləri dəvət olunacaq.

“Bakı Münaqişə Məktəbi”ni uğurla başa vurmuş iştirakçılar sosial fəaliyyətləri üçün kiçik maliyyə dəstəyi əldə etmək imkanına sahib olacaqlar. Həmçinin, məktəbi uğurla başa vurmuş iştirakçılar “Münaqişə Məktəbi Məzun Şəbəkəsi”nin üzvünə çevrilərək, bu şəbəkə daxilində baş tutan tədbir və təlimlərdən yararlana biləcəklər.

“Bakı Münaqişə Məktəbi″ndə 18-28 yaş aralığında olan tələbələr, yeni məzun olmuş gənclər və gənc mütəxəssislər müraciət edə bilər. Seçim müraciət edənlərin münaqişə sahəsinə olan marağı və digər meyarlar əsasında aparılacaq. İştirakçıların seçimi müraciət forması və müsahibələr əsasında baş tutacaq.

“Bakı Münaqişə Məktəbi” 6 – 15 fevral 2025-ci il tarixlərində həyata keçiriləcək. Məktəbin keçirilmə formatı oflayndır. “Bakı Münaqişə Məktəbi” boyunca iştirakçılar sadəcə nahar və çay fasiləsi ilə təmin olunacaqlar. Nəzərə almağınızı xahiş edirik ki, ölkə kənarında və Bakıdan kənarda yaşayan iştirakçıların yaşayış və yaşayışla bağlı digər xərcləri qarşılanmayacaq.

“Bakı Münaqişə Məktəbi”ndə iştirak etmək üçün 19 yanvar 2025-ci il tarixinədək müraciət formasını qeyd edilən keçidə daxil olaraq tamamlamağınızı xahiş edirik: https://forms.gle/DjWSqnEozTYGXpFJ6

Namizədlərin müsahibəyə dəvət edilməsi və seçilməsi müraciət etmə tarixinə əsasən aparılacaq. Bunun üçün iştirakçılardan mümkün qədər tez müraciət etməyini xahiş edirik.

Avrasiya Əməkdaşlıq Fondunun (AƏF) missiyası insanlara sosial ədalət və iqtisadi inkişaf üçün faydalı olan proqramlar vasitəsilə dəyişiklik etməyə imkan yaratmaq, onlara öz icmalarını və həyatlarını yaxşılaşdırmaqda yardım etməkdir.