Formula 1 Azərbaycan Qran Prisinin Marşal qeydiyyatı proqramına artıq start verilib

Bakı Şəhər Halqası Əməliyyat Şirkətinin (BŞH) tərkibində fəaliyyət göstərən Bakı Marşal Klubu (BMK) 10-12 İyun 2022-ci il tarixlərində keçiriləcək Formula 1 Azərbaycan Qran Prisinin Marşal qeydiyyatı proqramına artıq start verdi.

Paytaxt Bakının mərkəzi küçələrində bu möhtəşəm idman tədbirinin uğurla baş tutmasında birbaşa öz töhfəsini vermək istəyən və Proqrama cəlb olunmuş marşallar 2022 Formula 1 Azərbaycan Qran Prisinin əvəzolunmaz bir hissəsi olmaq, eyni zamanda Formula 1 yarışının həyəcanını trekə ən yaxın yerdən yaşamaq imkanına sahib olacaqlar.

Formula 1 yarış həftəsonunu uğurla başa çatdıran hər bir marşala Azərbaycan Avtomobil Federasiyasının təqdim etdiyi Beynəlxalq Avtomobil Federasiyası (FİA) tərəfindən qəbul olunmuş beynəlxalq lisenziya təqdim olunacaq. Beynəlxalq lisenziya marşallara, təkcə Azərbaycanda deyil, Formula 1 Qran Prisinə ev sahibliyi edən digər ölkələrdə keçiriləcək yarışlara qatılmaq hüququ verəcək.