“Özünlə Başla 4” Yay Məktəbi

Sabunçu Gənclər Evi və Gənclərin İnkişaf və Karyera Mərkəzinin birgə təşkilatçılığı ilə Nizami Gəncəvinin 880 illiyinə həsr olunmuş “Özünlə başla 4” yay məktəbinə Qusar Olimpiya və İdman Kompleksində start verilib.   “Özünlə başla 4” yay məktəbinin Sabunçu Gənclər Evi və Gənclərin İnkişaf və Karyera Mərkəzinin birgə təşkilatçılığı ilə 28 - 31 avqust tarixlərində keçirilməsi nəzərdə tutulub. Layihənin məqsədi gənclərin yay tətilinin səmərəli keçirilməsi, onların sosial və fərdi inkişafına keçirilən təlim və tədris proqramı ilə dəstək olmaq və aktiv və uğurlu gənclərin şəbələkəşməsinə zəmin yaratmaqdır.   700-ə yaxın gəncin müraciəti əsasında sosial aktiv, öz sahələrində uğurlar

qazanmış, həmçinin şəhid, qazi və müharibə iştirakçılarının ailələrindən olan seçilmiş 24 gəncin iştirakı ilə baş tutan yay məktəbi rəngarəng proqramı ilə iştirakçıların səmərəli vaxt keçirmələri üçün planlaşdırılıb.   Layihə çərçivəsində komanda oyunları, “Zirvə” intellektual oyunu, Skaut təlimləri, açıq havada film nümayişləri, Nizami irsinin öyrənilməsi ilə bağlı fəaliyyətlər, təlimçilər Kənan Bağırov, Gülşən Axundova və Şalan Novruzun təqdimatında “Gender problemi: Stereotiplər və Gənclik”, “Müsbət düşüncə və İnkişafımız”, “Liderlik və müsahibə”, “CV yazılması və müsahibə”, ”Komanda quruculuğu”, “Auditoriyada mən” mövzularında təlimlərin keçirilməsi nəzərdə tutulub.