Tələbələrarası Azərbaycan Kuboku davam edir

Mətbuat üçün açıqlama

Tələbələr arasında “Nə? Harada? Nə zaman?” intellektual oyunu üzrə Azərbaycan Kuboku uğrunda mübarizə davam edir.

Azərbaycan Respublikasının Gənclər və İdman Nazirliyinin dəstəyi, “Xəzər İntellektual Gənclər Klubu” İctimai Birliyinin və Azərbaycan Təhsil İşçiləri Azad Həmkarlar İttifaqının birgə təşkilatçılığı ilə reallaşdırılan “Tələbələrarası Azərbaycan Kuboku” layihəsi çərçivəsində Bakıda və regionlarda “Nə? Harada? Nə zaman?” intellektual oyunu üzrə seçim turları uğurla davam etdirilir.

Təşkilat Komitəsinin mətbuat xidmətindən verilən məlumata əsasən, layihədə ölkənin 10 regionunu və paytaxt Bakı şəhərini təmsil edən ali təhsil müəssisələri iştirak edir. Artıq 25 universiteti təmsil edən 227 komanda ilk seçim turunda bilik və intellektlərini nümayiş etdirmiş və növbəti mərhələyə vəsiqə qazanmaq uğrunda mübarizəyə qoşulmuşdur.

Layihənin əsas məqsədi Bakı və regionlarda təhsil alan tələbə-gəncləri intellektual fəaliyyətə cəlb etməklə onların Azərbaycan dili və ədəbiyyatı, tarixi, adət-ənənələri, milli-mənəvi dəyərləri, incəsənəti, musiqisi, kinosu və coğrafiyası üzrə biliklərinin artırılması, eyni zamanda maarifləndirmə prosesinə töhfə verilməsi və intellektual hərəkatın coğrafiyasının genişləndirilməsidir.

İkinci seçim turunun 12 aprel, üçüncü turun isə 3 may tarixində keçirilməsi nəzərdə tutulur. Layihənin kulminasiya nöqtəsi sayılan final mərhələsinin isə Azərbaycanın tarixi və mənəvi baxımdan əhəmiyyətli bölgələrindən biri – Qarabağın elm mərkəzi kimi tanınan Xankəndi şəhərində təşkili planlaşdırılır.

Layihədə iştirak etmək üçün (https://shorturl.at/xzzbU) Xəzər İntellektual Gənclər Klubuna müraciət etmək mümkündür.

Qeyd edək ki, final mərhələsində fərqlənən komandalar kubok, medal və dəyərli hədiyyələrlə təltif olunacaqlar. Bu təşəbbüs, gənclər arasında intellektual fəaliyyətin stimullaşdırılması və onların milli-mədəni irsimizlə daha yaxından tanış olmaları baxımından mühüm əhəmiyyət kəsb edir.

Ətraflı məlumat üçün:

https://shorturl.at/xzzbU

https://shorturl.at/Atqd1