İlk yazım ekstrovertlər (Mən kiməm? - Extrovert) haqqında idi. Bu yazımda isə introvertlər haqqında danışacağam. İntrovertlər haqqında Syuzen Keyn maraqlı kitablar yazıb, digər bir kitabı da “İntrovertləırin gücü” adlanır. #İntrovert – ekstrovertin tam əksidir. İntrovertlərin öz daxili dünyası var. Bəzən ətraf aləmdə olub-bitənlər nəinki onları narahat edir, hətta bundan xəbərləri belə olmur. İntrovertlər ünsiyyəti bir o qədər də sevmirlər, lakin öz maraq dairələrinə aid mövzu olarsa, gözəl həmsöhbət ola bilərlər. Ünsiyyəti sevməməkləri onların utancaq olmaqları anlamına gəlmir, sadəcə mənasız dialoqlardan həmişə qaçırlar.İntrovertlər susmağa üstünlük verdikləri üçün, bəzən onların nələri bildiyini və ya bilmədiyini anlaya bimirik. Xoşbəxtlik quşu başımıza qonub bir introvertin rəğbətini qazana bilmişiksə, o zaman onların bir çoxunun nə qədər zəngin daxili aləmlərinin, bilik və bacarıqlarının olduğunu görə bilərik. İntrovertlər başqalarının fikirləri ilə oturub-durmağı sevmir, əldə etdikləri bilik və təcrübələrinə əsaslanırlar. İntrovertlər çox kitab oxumağı sevirlər. Onlar bütün işlərini planlaşdırırlar. İntrovertlər sakit və tək olduqda daha səmərəli şəkildə işləyirlər. İntrovertlərin ən çox istifadə etdiyi ifadələr “mənə düşünmək üçün vaxt verin”, “məsələni dərindən müzakirə etmək lazımdır” və s. bu kimi qəbildən olan ifadələrdir. İntrovertlər:

• Tək və ya yaxın ailə üzvləri ilə birlikdə olmağı sevirlər;
• Hər adamı “dost”, “rəfiqə” adlandırmırlar;
• Başqalarını müzakirə etməyi, dedi-qodu və qeybəti sevmirlər;
• Sakit təbiətli və təmkinlidirlər;
• Ekstrovertlərdən fərqli olaraq, əvvəlcə düşünüb, sonra danışırlar;
• Diqqət mərkəzində olmağı qətiyyən sevmirlər;
• Bir anda ancaq bir işlə məşğul olmağl sevirlər; “multitasking” və işdə yüklənmə onlara görə deyil;
• İntrovertlərin öz xəyal aləmi var və bəzən real həyatdansa, öz dünyalarında daha xoşbəxtdirlər;
• İntrovertlər həm fikrilərinə, həm də sevdiklərinə qarşı çox sadiq olurlar;
• Xəbərsiz və qəfil gələn qonaqları sevmirlər;

İntrovertlərlə işləmə qaydası:

• İntrovertlər bir məsələ haqqında uzun-uzadı düşünürlər, ona görə də bəzən “ləng işçi” təsiri bağışlayırlar. İntrovertlərə düşünmək, məsələni analiz etmək üçün vaxt vermək lazımdır. Bilmədikləri məqamı dərindən araşdırmaq introvertlərin başlıca xüsusuiyyətlərindəndir;
• İntrovertlər hər hansı bir məsələni dəqiqləşdirmək məqsədilə həddindən artıq çox sual verməyi sevirlər;
• İntrovertlər də, ekstrovertləır qədər olmasa da təriflənməyi çox sevirlər (kim sevmir ki?);
• İntrovertə işdə tapşırıq verərkən mütləq şəkildə için başa çatması ilə bağlı konkret vaxt qoymaq lazımdır, əks halda o, məsələni araşdırdıqca, araşdıracaq.
• İntrovertə hər məsələni ayrı-ayrılıqda və detallı izah etmək lazımdır;
• İntrovertlər üzbəüz ünsiyyətdənsə elektron poçt və digər ünsiyyət vasitələrindən istifadə etməyə üstünlük verirlər: necə deyərlər, danışmaqdansa, yazmağı üstün tuturlar.

Uzun sözün qısası, ətrafınızda introvert varsa, “oy, necə darıxdırıcı adamdır”, “həmişə qaşqabaqlı gəzir” deməzdən əvvəl onu dərindən tanımağa çalışın.

Sevinj Garakishiyeva